Fevralın 6-dan 7-nə kimi Bakıda Gənclər və İdman, Təhsil və İqtisadi İnkişaf nazirlikləri ilə birlikdə BMT-nin Uşaq Fondu (UNICEF) tərəfindən təşkil edilmiş, sosial məsələlərin həllində gənclərin iştirakına həsr olunmuş konfrans keçiriləcək. Bu barədə Trend ə UNICEF-in Bakı ofisindən məlumat verilib.
"Azərbaycan gəncləri üçün parlaq gələcəyin qurulması" adlı tədbirdə hökumət, parlament, regionların icra hakimiyyəti, QHTvə KİV nümayəndələri, o cümlədən gənclər də iştirak edəcək.
Konfransın nəticələrinin 2006 -2015 - ci illərdə Azərbaycan Respublikasında Yoxsulluğun Azaldılması və Davamlı İnkişaf üzrə Dövlət Proqramının bir tərkib hissəsinə çevrilməsi gözlənilir.
Tədbir (fevral 4-5) yalnız gənclər - məktəb şagirdləri və universitet tələbələri, küçə uşaqları, məcburi köçkün uşaqları və qüsurlu uşaqlar da daxil olmaqla ölkənin hər tərəfindən 14-18 yaşlı gənclər üçün ikigünlük görüşlə müşayiət olunacaq ki, bu da onların bir-biri ilə tanışlığı, fikir mübadiləsi aparması və böyüklərin iştirakı ilə keçirilən konfransa hazırlaşmasına imkan yaradacaq.
Konfransın keçirilməsi üçün beynəlxalq səviyyədə tanınmış təşkilat olan və planlaşdırma metodundan isitfadə edən Future Search Associates Azərbaycana dəvət olunub. İnsanların sosial-iqtisadi inkişaf proqramlarında iştirak edə biləcəyi bu metod Şimali və Cənubi Amerika, Afrika, Avstraliya, Avropa, Hindistan və Cənubi Asiya ölkələrində uğurla tətbiq edilib.
Trend-in ən mühüm və maraqlı xəbərlərini "Telegram"da izləyin
