Salyan rayon baytarlıq idarəsinin baş həkimi Məhəmməd Həsənov rayonun Daikənd və Sarvan kəndlərində quş qripi təhlükəsi ilə bağlı şübhəli vəziyyətlə əlaqədar bildirir ki, həmin kəndlərdən respublika baytarlıq laboratoriyasına göndərilən ev quşlarından götürülmüş nümunələrin analizinin ilkin nəticələri göstərir ki, ev quşları arasında "quş qripi" virusu yoxdur.
Ona görə də ərazidə karantin tətbiq edilməsinə ehtiyac yaranmayıb. Amma hər ehtimala qarşı mülki müdafiə idarəsinin rəisi Kamil Bağırov başda olmaqla dezinfeksiya işlərini həyata keçirəcək 20 nəfərlik heyət Bakıdan Salyana ezam olunub.
Hazırda Daikənd və Sarvan ərazisində daha geniş miqyaslı dezinfeksiya işləri aparılır. Salyanda işlərini başa vurduqdan sonra dezinfektorlar quşçuluq fabrikində quş qripi faktının rəsmi təsdiqləndiyi Biləsuvar rayonunda, sonra isə Neftçalada iş aparacaqlar.
