Mərkəzi Seçki Komissiyasının (MSK) sədri Məzahir Pənahov 7-10 aprel 2006-cı il tarixdə Mərkəzi və Şərqi Avropa Seçki Rəsmiləri Assosiasiyasının (MŞASRA) baş katibi Zoltan Totun dəvəti ilə Macarıstanda səfərdə olacaq. Bu barədə Trend ə MSK-dan məlumat verilib.
Səfərin məqsədi 9 apreldə bu ölkədə keçiriləcək parlament seçkilərini müşahidə etmək, o cümlədən MŞASRA rəhbərliyi ilə görüşərək MSK ilə bu qurum arasındakı gələcək əməkdaşlığın perspektivləri barədə müzakirə aparmaqdır.
Qeyd edək ki, əsası Budapeştdə qoyulmuş MŞASRA-nın əsas qayəsi demokratik proses və proseduraların təkmilləşdirilməsi, seçki təsisatlarının ixtisaslaşmasına yardım göstərməkdir. Hazırda təşkilata 21 ölkənin seçki qurumları daxildir. Azərbaycanın Mərkəzi Seçki Komissiyası da 2001-ci ildən bu təşkilatın üzvüdür və onunla sıx əməkdaşlıq edir.