"Yox" Hərəkatında siyasi partiya mənsubiyyəti olan və fəaliyyəti bu təşkilatın məqsədlərinə uyğun gəlməyən bütün üzvlər xaric ediliblər. Bu barədə Trend ə "Yox" Hərəkatının təsisçisi və beynəlxalq konsultantı Razi Nurullayev məlumat verib. O, bildirib ki, təşkilatda ayrı-ayrı siyasi partiyaların üzvü olan gənclərin bir qismi ilə əməkdaşlıq dayandırılıb, bir qismi isə hərəkatın sıralarından uzaqlaşdırılıblar. R.Nurullayevin sözlərinə görə, təşkilatın bəzi üzvləri tərəfindən bəzən ayrı-ayrı partiyaların maraqlarına, onun liderlərinin təbliğinə yönəlmiş, həmçinin vətəndaş hərəkatının məqsədlərinə uyğun gəlməyən fəaliyyətə cəhd göstərilib: "Lakin "Yox" Hərəkatı siyasi təşkilat deyil, ictimai, milli maraqları əsas tutan vətəndaş hərəkatıdır. Bu məqsədlərdən kənara çıxanları sivil yolla, diplomatikcəsinə sıralarımızdan kənarlaşdırmağa qərar verdik və bu proses artıq başa çatıb".
R.Nurullayev deyib ki, bəzi üzvlərin xaric olunması və əməkdaşlığın dayandırılması onlar tərəfindən narazılıqla qarşılanıb. Onun sözlərinə görə, etiraz edənlər də məhz öz siyasi məqsədlərini güdənlər olub. R.Nurullayev deyib ki, "Yox" Hərəkatından bir çox gənclərin uzaqlaşdırılması nəticəsində təşkilatın üzvlərinin sayı azalıb, lakin yeni üzvlərin qəbul olunması bu balansı nisbətən qoruyub.