Çin Xalq Respublikasından gələn Çan Qann şirkətinin nümayəndələri bu gün Gəncə şəhər İcra Hakimiyətinin başçısı Eldar Əzizovla görüşüblər. Qonaqları salamlayan şəhər rəhbəri bildirib ki, xarici şirkətlərin Azərbaycana marağının yüksək olması çox yaxşı haldır. Bu, ölkəmizdə sahibkarlıq fəaliyyəti üçün yetərincə şərait yaradalmasının göstəricisidir. O, ümidvar olduğunu bildirib ki, San Qann şirkəti ilə Gəncə Avtomobil Zavodu arasında bağlanan müqavilə şəhərin inkişafına yardımçı olacaq, yeni iş yerlərinin yaranmasına şərait yaradacaq.
Qonaqlar səmimi qəbula görə şəhər rəhbərinə minnətdarlıqlarını bildirdilər. Çan Qann şirkətinin prezidenti Xan Minq bildirdi ki, o, yaşadığı Tsyun Syun şəhərinin məclis üzvüdür və Gəncə və Tsyun Sun şəhərlərinin qardaşlaşmasını arzulayar. Bu fikiri həyata keçirmək onun səlahiyyətləri daxilindədir. Cənab Eldar Əzizov da bu təklifi yüksək qiymətləndirdiyini bildirib və əlavə edib ki, bunun üçün lazım olan sənədlər hazırlanacaq. İcra başçısı onu da əlavə edib ki, Gəncə Azərbaycanın qədim tarixə malik şəhəridir və bu gün dayanmadan inkişaf edir. Əgər bu gün hansı şirkət burada iş birliyi qursa, o da inkişaf edəcək.
Sonda qonaqlar xatirə şəkilləri çəkdirdilər.