ABŞ-ın Azərbaycandakı yeni fövqəladə və səlahiyyətli səfiri Enn Ders (Anne Derse) Bakıya iyulun birinci yarısında gələcək. Bu barədə Trend ə ABŞ səfirliyinin ictimai əlaqələr şöbəsinin rəhbəri Conatan Henik məlumat verib.
Xatırladaq ki, ABŞ prezidenti Corc Buş aprelin 13-də Enn Dersin namizədliyini Azərbaycanda səfir postuna irəli sürüb. Mayın 12-də ABŞ Konqresi Enn Dersi bu postda təsdiqləyib.
Enn Ders Ağ evin Müdafiəsi üzrə Şurada biomüdafiə siyasəti üzrə direktor işləyib. Buna qədər o, ABŞ-ın Bağdaddakı səfirliyində iqtisadi əlaqələr üzrə müşavir vəzifəsində çalışıb. Daha əvvəl isə bu vəzifəni Avropa Birliyindəki Amerika missiyasında icra edib. O, Makalester Kollecinin (Macalester College) bakalavr və Con Hopkins İnstitutunun (the Johns Hopkins University) magistr dərəcələrinə malikdir.
