2006-cı ilin yanvar-may ayları ərzində Gəncə şəhərində 38 yol-nəqliyyat qəzası baş verib ki, bunun nəticəsində 8 nəfər dünyasını dəyişib, 41 nəfər müxtəlif dərəcəli xəsarətlər alıb. Bu açıqlamanı Gəncə şəhər Polis İdarəsinin rəis müavini İlqar Balakişiyev verib. Onun sözlərinə görə, bu göstərici ötən ilin ilk 6 ayı ilə müqayisədə aşağı olsa da, bəzi xoşagəlməyən halların sayı artıb. Belə ki, bu ilin 6 ayı ərzində yol-nəqliyyat qəzası baş verən yerdən sürücülərin qaçaraq gizlənməsi faktı çoxalaraq 9-a çatıb.
"Əlbəttə polis əməkdaşlarının isti izlərlə keçirdiyi əməliyyat tədbirləri nəticəsində onların 9-u da tutularaq istintaqa təhvil verilib. Lakin ən vacibi odur ki, həmin vətəndaşlar zərərçəkəni hadisə yerində ağır vəziyyətdə qoyaraq qaçıblar. Bu isə həm insani, həm də qanunçuluq baxımından çox mənfi hal kimi qiymətləndirilir"- deyə o fikirlərinə əlavə edib. Onun sözlərinə görə, sürücülər hadisə baş verən zaman zərərçəkəni xəstəxanaya aparmaqla və könüllü surətdə polis idarəsinə gəlməklə öz vəziyyətlərini yüngülləşdirirlər.
Rəis müavini qeyd edir ki, Gəncə şəhəri Polis İdarəsi yerli televiziyaların köməkliyi ilə bir sıra maarifləndirici verilişlər hazırlayıb. Bu yolla sürücülərdə əsl vətəndaşlıq hisslərinin yaranmasına çalışırıq.
