Bakı şəhər İcra Hakimiyyəti Dini Etiqadlar və Iicdan Azadlıqları Müdafiə Mərkəzinin (DEVAMM) İsrailin Livana qarşı hərbi əməliyyatlarına etiraz olaraq keçirmək istədiyi yürüş-mitinqə icazə verməyib. Bu barədə Trend ə DEVAMM-ın rəhbəri İlqar İbrahimoğlu bildirib.
Qeyd edək ki, DEVAMM məlum məsələ ilə bağlı aksiyasını iyulun 23-də saat 17.00-dan 18.00-dək metronun "20 Yanvar" stansiyasından "Qələbə" meydanınadək yürüş-mitinq keçirməyi planlaşdırıb.
İ.İbrahimoğlu qeyd edib ki, meriya onlara məlum məsələ ilə bağlı etirazlarını mətbuat vasitəsilə, müxtləif tədbirlər keçirməklə bildirməyi təklif edib: "Gələn həftədən başlayaraq bu məsələ ilə bağlı bir sıra tədbirlər keçirəcəyik. Ancaq İsrailin Livana qarşı apardığı hərbi əməliyyatlara etiraz olaraq aksiyaları gündəmdə saxlamışıq. Ola bilsin ki, tədbirlərin ardınca aksiyalar keçirək".