"Seçki Məcəlləsinə dəyişikliklər edilsə belə, Azərbaycanda seçki prosesində ciddi dəyişklik baş verəcəyini gözləmirəm". Trend in məlumatına görə, bu fikirləri jurnalistlərə açıqlamasında müxalifətçi millət vəkili Pənah Hüseyn bildirib.
Qeyd edək ki, son illərdə Azərbaycan müxalifəti tərəfindən səslənən əsas tələblərdən biri Seçki Məcəlləsinə dəyişiklik edilərək seçki komissiyalarının siyasi qüvvələr arasında paritet əsasda formalaşdırılması tələbidir. Pənah Hüseyn Seçki Məcəlləsinin dəyişdirilməsinin əleyhdarı olmadığını deyib. Lakin onun fikrincə, buna siyasi məsələ kimi yanaşılmalıdır.
"Çünki seçki komissiyalarının tərkibinin dəyişdirilməsi ölkənin demokratikləşməsi uğrunda aparılan mübarizənin bir formasıdır. Seçki komissiyalarının paritet əsasda formalaşdırılması məsələsi artıq Məcəllənin dəyişdirilməsindən kənara çıxan bir məsələdir. Buna da hələ ki, gedilmir və belə bir niyyət də görünmür. Yerdə qalan dəyişiklər isə edilə də bilər, edilməyə də. Çünki mahiyyət etibarilə qalan məsələlər seçki prosesində ciddi dəyişikliyə gətirib çıxarmayacaq" - deyə P.Hüseyn vurğulayıb.
