Bu gün Salyan rayonunun "Ağ evlər" yaşayış massivinin 100-ə yaxıın sakini kəndin mərkəzində aksiya keçirib. Bir yerə toplaşan əhali 20 gündən artıqdır ki, işıqsız qalmaqlarına etirazlarını elektrik transformatorunun sıradan çıxmasından bildiriblər. 500-ə yaxın insanın yaşadığı massivə oktyabrın 7-də elektrik transformatorunun sıradan çıxmasından sonra enerji verilməsi dayandırılıb.Yerli sakinlərin dediyinə görə, ötən ay 81 evin hər birindən 30 min manat işıq pulu alınsa da, indi təmir üçün də onlardan pul umurlar. Həmin pulu ödəmədikləri üçün isə bu günə qədər işıqsız qalıblar.
Salyan paylayıcı elektrik şəbəkəsinin direktoru Faiq Həmzəyev isə təmir üçün əhalidən pul istənilməsinin yalan olduğunu bildirdi. Direktor dedi ki, massivdə sakinlərin istifadəsi üçün təbii qaz olmadığından havalar soyuyan kimi elektrik transformatoru artıq yüklənmədən yanıb. Oktyabrın 13-də yeni transformator qoyulsa da, bir neçə saat sonra o da sıradan çıxıb. Hazırda kəndin elektrik transformatoru Əli Bayramlıdakı sexdə təmir olunur, bir neçə gündən sonra işlək vəziyyətdə yerinə qaytarılacaq.
F.Həmzəyev onu da bildirdi ki, indi həmin ərazidə də elektrik enerjisindən istifadəyə görə sayğaçlaşma işlərinə başlanıb ki, bu da enerji israfçılığının qarşısını alacaq.
