Baş Prokurorluğun Korrupsiya ilə Mübarizə İdarəsi yaxın vaxtlarda regionlarda nümayəndəliklərini açacaq. Bu barədə məlumatı idarənin prokuroru Pərvin Quliyev Gəncədə keçirilən tədbirdə verib.
Trend bildirir ki, tədbirdə Gənclər və İdman Nazirliyinin təşəbbüsü ilə gənclərin iştirakı ilə keçirilib. Yığıncaqda şəhər Gənclər və İdman İdarəsinin, İcra Hakimiyyəti Başçısı Aparatının məsul şəxsləri və digər nümayəndələr də iştirak edib. Məruzə ilə çıxış edən Pərvin Quliyev korrupsiya ilə mübarizə üçün xüsusilə gənclərin yetərincə maarifləndirilməsinə ehtiyac olduğunu və sözügedən ictimai bəla ilə mübarizədə ilkin olaraq dövlət işinin şəffaflaşdırılmasına nail olmağın vacibliyini vurğulayıb. O, həmçinin korrupsiya ilə mübarizəni bütün dövlət orqanlarının və vəzifəli şəxslərin borcu adlandırıb.
P. Quliyev 2004-cü ildə prezidentin müvafiq fərmanına əsasən yaranan antikorrupsiya idarəsinə iki il ərzində kifayət qədər şikayətlərin daxil olduğunu söyləyib:
"Qısa müddət ərzində idarəmizdə 200-dən artıq şikayətə baxılıb, 40-dan artıq cinayət işinin istintaqı tamamlanıb və bu işlər məhkəməyə göndərilib. Biz bu yöndə rayon prokurorluqları və digər hüquq-mühafizə orqanları ilə əlaqə saxlayırıq".
Digər çıxış edənlər də korrupsiyanın yaratdığı fəsadlardan danışıb, bu sahədəki mübarizə yolları bardə gənclərə tövsiyələr veriliblər.
