Naxçıvan MR Standartlaşdırma, Metrologiya və Patent üzrə Dövlət Agentliyində təşkil olunmuş yığıncaqda Azərbaycan Respublikası ərazisində qüvvədə olma müddəti 20 il müəyyən edilməklə 4 ixtira müəllifinə patentlər təqdim olunub. Trend in Naxçıvan Bürosu xəbər verir ki, tədbirdə ixtiraların istehsalata tətbiqi məsələlərindən də danışılıb.
Tədbirdə miss (I) triostibitin və sürmə filizindən sürmə (III) sulfidin alınma üsulları ixtiralarının müəllifi, kimya elmləri doktoru Bayram Rzayev və onunla birlikdə yüksək təmizlikli kalsium xloridin alınması və natrium xloridin təmizlənmə üsullarının müəllifi Əhməd Qarayevə müəlliflik diplomları təqdim edilib.
Qeyd edək ki, indiyədək agentliyin "Patent" şöbəsinə müxtəlif sahələr üzrə 20 ədəd ixtiraya, 9 ədəd sənaye nümunəsinə və 1 ədəd faydalı modelə patent verilməsi üçün müraciət daxil olub. Həmin ixtiraların 8-i kimya. 9-u fizika, 3-ü tibb və biologiya sahələrini əhatə edir. Onlardan 12-si AMEA-nın Naxçıvan Bölməsindən, 1 ixtira Naxçıvan Dövlət Universitetindən, 7 ixtira isə fiziki şəxslər tərəfindən təqdim edilib. Hazırda 13 ixtira üzrə iddia sənədlərinin ekspertizası davam etdirilir.
