Naxçıvan MR-in regionlarında ünvanlı sosial yardım verilməsi prosesi davam edir. Trend in Naxçıvan Bürosu Culfa Rayon Əhalinin Sosial Müdafiəsi Mərkəzinə istinadən xəbər verir ki, təşkilata indiyədək 1860 ailə müraciət edib.
İlkin mərhələdə onlardan yalnız 900 ailənin ərizəsinə baxılıb. Müraciət edən digər 960 ailənin aylıq gəlirləri ehtiyac meyarından artıq olduğundan ərizələrə baxılmaqdan imtina edilib.
Yaradılmış komissiya tərəfindən 900 ailənin ərizəsinə baxılarkən 447 ailənin öz gəlirlərini gizlətdiyi məlum olub. Buna görə də eyni sayda iddia təmin olunmayıb.
Culfa Rayon Əhalinin Sosial Müdafiəsi indiyədək Mərkəzi 453 aztəminatlı ailəyə ünvanlı sosial yardım təyin edib. Ümumiyyətlə isə, bu ailələrə 65 min 521 manat yardım verilib.
