Mingəçevir Şəhər Polis İdarəsinin həbsdə olan 3 əməkdaşının cinayət işi üzrə materiallar Ağır Cinayətlərə Dair İşlər üzrə Məhkəməyə göndərilib. Bu barədə Trend ə Mingəçevir Şəhər prokurorunun köməkçisi Səməd Yusubov məlumat verib.
Həbsdə olan polislər Mingəçevir Polis İdarəsinin cinayət axtarış bölməsinin rəisi İlqar Abbasov, bölmənin əməliyyat müvəkkili Elçin Musayev və polis nəfəri Ramiz Murğuzovdur. Bu polis işçiləri Mingəçevir şəhər sakini olan Qarabağ müharibəsi əlili Rasim Əlişovun ölümündə təqsirli bilinirlər. Cinayət işi üzrə ibtidai istintaqı Mingəçevir şəhər Prokurorluğu aparıb.
Qeyd edək ki, R.Əlişov iyulun 25-də polis idarəsinin binasında döyülərək öldürülməsindən sonra daxili işlər nazirinin əmri ilə idarədə xidməti təhqiqat aparılıb. Təhqiqatın rəyindən sonra İ.Abbasov tutduğu vəzifədən və daxili işlər orqanlarından, E.Musayev tutduğu vəzifədən azad olunub. 3 nəfər polis əməkdaşına isə töhmət verilib. İstintaqın gedişatında isə üç polis əməkdaşı həbsə alınıb.
Ağır Cinayətlərə Dair İşlər üzrə Məhkəmədən isə bildiriblər ki, iş məhkəməyə yeni daxil olduğundan hələlik heç bir hakimin icraatına verilməyib.
