Naxçıvan şəhərində üçüncü çağırış Naxçıvan MR Ali Məclisinin dördüncü sessiyası keçirildi. Bu barədə Trend in Naxçıvan Bürosu məlumat verir.
Naxçıvan MR Ali Məclisinin 45 deputatı sessiyada iştirak etdiyindən sessiya öz işinə başlamağa səlahiyyətli hesab edilib. Sessiyanın gündəliyinə 2006-cı ildə Naxçıvan MR-in sosial-iqtisadi inkişafının yekunları, Naxçıvan MR-in 2006-cı il dövlət büdcəsinin icrası, regionun 2007-ci il üçün dövlət büdcəsinin təsdiqi edilməsi, Naxçıvan MR İnsan hüquqları üzrə müvəkkilinin (Ombudsmanın) hesabatı, Naxçıvan MR Ali Məclisi sədrinin fərmanlarının təsdiq edilməsi məsələləri salınaraq müzakirə edilib.
Naxçıvan MR Ali Məclisinin sədri Vasif Talıbov ötən il Naxçıvan MR-in sosial-iqtisadi inkişafının yekunları ilə əlaqədar məruzə edib. Sədr ötən il qazanılan nailiyyətlərdən danışaraq əldə olunmuş nəticələri statistik rəqəm və faktlarla təhlil edib. Vasif Talıbov buraxılmış nöqsanlardan da danışıb, 2007-ci idə qeyd olunan çatışmazlıqların aradan qaldırılması məqsədilə müvafiq strukturlara tapşırıqlar verib.
Naxçıvan MR maliyyə naziri Xalid İsgəndərov "Naxçıvan MR-in 2006-cı il dövlət büdcəsinin icrası" və "Naxçıvan MR-in 2007-ci il dövlət büdcəsinin təsdiq edilməsi" barədə çıxış edib. Naxçıvan MR verigilər naziri Rafiq Mehdiyev və Naxçıvan MR Dövlət Gömrük Komitəsinin sədri Asəf Məmmədovun çıxışından sonra gndəlikdə duran dördüncü məsələ ilə əlaqədar Naxçıvan MR-in İnsan hüquqları üzrə müvəkkil (Ombudsman) Ülkər Bayramovanın hesabatı dinlənilib.
Sonda Naxçıvan MR Ali Məclisi sədrinin fərmanları təsdiq edilib, müvafiq qərarlar qəbul edilib. Vasif Talıbovun yekun çıxışı ilə üçüncü çağırış Naxçıvan MR Ali Məclisinin dördüncü sessiyası öz işini başa çatdırıb.
