Bu gün Gəncənin "Kəpəz Bazar" ATSC-nin satıcıları bazarın qarşısında etiraz aksiyası keçiriblər. Trendin Qərb Bürosunun verdiyi məlumata görə aksiya bazarda kassa aparatlarının quraşdırılmasına etiraz olaraq keçirilib.
Satıcıların verdiyi məlumata görə artıq bir neçə gündür ki, 12 saylı Ərazi Vergilər İdarəsinin əməkdaşları gələrək bazarda kassa aparatlarının quraşdırılamısını tələb edib. Əks halda bazarın fəaliyyətinin dayandırılacağını söyləyiblər. "Biz hər gün 60 qəpik ödəməklə vergimizi də ödəmiş oluruq. Elə satıcı var ki, onun 250-300 manatlıq malı var. Ona kassa aparatı qoymaq düzgün deyil. Bundan başqa bazarda heç elektrik xətti yoxdur. Kassa aparatını necə işlətmək mümkün olacaq" deyə satıcı Qasım İbadov bildirdi.
12 saylı Ərazi Vergilər İdarəsinin vergi ödəyicilərinə xidmət şöbəsinin müdiri Azər Məmmədov Trendə bildirdi ki, Azərbaycan respublikasının Vergi Məcəlləsinə edilmiş əlavə və dəyişikliklərə görə yanvar ayından nəğd ödəniş aparan satış obyektlərinə kassa aparatı quraşdırmalıdır. "Satıcılar bu vaxta kimi kassa aparatı işlətməyiblər. Ona görə də onlara bu aparatı işlətmək çətin gəlir. Biz təbliğat kompaniyamızı işə salacağıq. Çalışacağıq ki, satıcıları bu barədə ətraflı məlumatlandıraq. Sonra isə kassa aparatlarının tətbiqinə başlayaq" - A. Məmmədov bildirdi.
