Naxçıvan MR DİN-də kollegiya iclası keçirilib. Trend in Naxçıvan Bürosu xəbər verir ki, iclas ötən ilin yekunlarına həsr edilib.
İclasda çıxış edən Naxçıvan Daxili İşlər naziri polis general-leytnantı Əhməd Əhmədov 2006-cı il ərzində cinayətkarlığa qarşı mübarizə və ictimai təhlükəsizliyin təmin edilməsi üzrə Muxtar Respublika Daxili İşlər Orqanlarının fəaliyyəti haqqında məruzə edib. Nazir bildirib ki, 2006-cı ildə Muxtar Respublikada qeydə alınmış cinayətlərin ümumi sayı 14,4% azalıb.
Onun sözlərinə görə hesabat dövründa regionda 113 cinayətdən 89-u DİN üzrədir və həmin cinayətlərdən 85-i məhkəməyə göndərilib. Bütövlükdə, cinayətlərin açılma faizi 2005-ci ilin müvafiq dövründən fərqli olaraq 100%-dən 98,8% enib. DİN üzrə bir cinayət bağlı qalıb.
Törədilən cinayətlərin baş vermə səbəblərini təhlil edən Əhməd Əhmədov qeyd edib ki, polis orqanları tərəfindən qeydə alınmış cinayətlərdən 19-u şəxsiyyət əleyhinə olan, 10-u iqtisadi sahədə, 49-u ictimai təhlükəsizlik və ictimai qayda əleyhinə, 11-i isə dövlət hakimiyyəti əleyhinə olan cinayətlərdir. Cinayətlərin təsnifatına görə 18-i ağır və xüsusilə ağır, 49-u az ağır, 22-si böyük ictimai təhlükə törətməyən cinayətlərdir.
Məruzə ətrafında rayon polis şöbələri rəislərinin çıxışları da dinlənilib. Kollegiya iclasına Naxçıvan MR Daxili İşlər naziri Əhməd Əhmədov yekun vurub.