Azərbaycanın ATƏT Parlament Assambleyasındakı (ATƏT PA) nümayəndə heyətinin üzvləri qurumun qış sessiyasında iştirak etmək üçün fevralın 20-də Avstriya paytaxtı Vyanaya yola düşəcəklər. Bu barədə Trend ə açıqlamasında Azərbaycanın ATƏT PA-dakı nümayəndə heyətinin sədr müavini, Milli Məclisin Aqrar siyasət daimi komissiyasının sədri Eldar İbrahimov məlumat verib.
Xatırladaq ki, ATƏT PA-nın qış sessiyası fevralın 22-23-ü tarixlərində Vyanada keçiriləcək.
E.İbrahimov deyib ki, ATƏT PA-nın qış sessiyasının gündəliyinə hansı məsələlərin daxil edildiyi açıqlanmayıb. Hələlik yalnız o məlumdur ki, qış sessiyasında ATƏT regionunda enerji təhlükəsizliyi məsələsi müzakirə olunacaq.
Komissiya sədri əlavə edib ki, ATƏT PA-nın qış sessiyası Xocalı faciəsinin növbəti ildönümü ərəfəsində keçirildiyinə görə, Azərbaycanın qurumdakı nümayəndə heyəti hər il olduğu kimi bu dəfə də Dağlıq Qarabağ münaqişəsini gündəmə gətirəcək.
"Xocalı faciəsi ilə bağlı bir sıra materallar aparacağıq və orada deputatlar arasında yayacağıq. Bundan başqa Azərbaycanın işğal olunmuş ərazilərinin Ermənistan tərəfindən yandırılması məsələsini qaldıracağıq. Qış sessiyası çərçivəsində diqqət mərkəzində saxlayacağımız əsas məsələ Dağlıq Qarabağ münaqişəsi olacaq", -deyə nümayəndə heyətinin sədr müavini vurğulayıb.
Onun sözlərinə görə, Azərbaycanı təmsil edən deputatlar hər sessiyada Dağlıq Qarabağ münaqişəsinin həllində vasətəçilik edən ATƏT-in Minsk qrupu həmsədrlərinin qurumun Parlament Assambleyasında hesabat verməsini tələb edirlər. Lakin bu tələb hələ də yerinə yetirilməyib: "ATƏT-in fəaliyyətdə olan sədri fevral sessiyasında çıxış edərək, deyir ki, mən bu vəzifəyə yeni təyin olunmuşam. Bölgəyə səfər edərək vəziyyətlə yerindəcə tanış olacam və sair. Lakin bu səfərlərin hələ də heç bir nəticəsi yoxdur."
Qeyd edək ki, Azərbaycanın ATƏT PA-dakı nümayəndə heyətinə Milli Məclis sədrinin müavini Bahar Muradova rəhbərlik edir. Nümayəndə heyətinə millət vəkilləri Eldar İbrahimov, Rəbiyyət Aslanova, Musa Quliyev, Fəttah Heydərov və Fazil Mustafayev daxildir.
