Bakı Şəhər İcra Hakimiyyəti müxalifətyönlü Müsavat Partiyasının fevral 18-də keçirmək istədiyi yürüş-mitinqə icazə verib. Bu barədə Trend ə Müsavat Partiyasının mətbuat xidmətindən bildirilib.
Meriya yürüş-mitinqin metronun "Həzi Aslanov" stansiyasının qarşısından Ukrayna dairəsindək keçirməyə icazə verib.
Müsavat başqanının müavini Mehman Cavadoğlu bildirib ki, partiya aksiyanı bu marşrut üzrə keçirmək barədə qərar qəbul edib. Aksiyada Tarif Şurasının enerji daşıyıcılarının və kommunal xidmətlərin qiymətlərini qaldırması haqda qərarının icrasını dayandırmaq tələb olunacaq.
Xatırladaq ki, yanvarın 28-də Müsavat Partiyası eyni tələblərlə eyni marşrut üzrə yürüş-mitinq keçirmişdi.
Qeyd edək ki, müxalifəti təmsil edən Müsavat Partiyası 1992-ci ildə yaradılıb. Partiyanın başqanı İsa Qəmbər Azərbaycan parlamentinin eks-spikeri (1992-93-cü illərdə) və 2003-cü ildə keçirilmiş prezident seçkisində prezidentliyə namizəd olub.