Azərbaycan,Bakı/müxbir " S.Ağayeva/Azərbaycan prezidenti İlham Əliyevin 15-16 mart tarixində Tacikistana rəsmi səfəri çərçivəsində iki ölkə arasında ikitərəfli əməkdaşlığa dair 5-7 sənədin imzalanması nəzərdə tutulub. Bu barədə Tacikistan XİN-in idarə rəisi Rüstəm Dodocanov məlumat verib.
"Prezidentlərin imzalayacağı əsas sənəd Azərbaycan və Tacikistan arasında dostluq və əməkdaşlıq Müqaviləsdir. Müqavilə layihəsi artıq hazırdır. Digər sənədlər razılaşdırılma mərhələsindədir", - deyə o qeyd edib. Onların arasında mədəniyyət və incəsənət, qarşlıqlı səfərlər və başqa sahələrdə əməkdaşlıq haqqında sazişlər var. Tacikistan hökuməti investisiyaların təşviqi və birgə mühafizəsi, vergiqoymaya yol verməmək və ticarət-iqtsiadi əməkdaşlıq haqqında sazişləri imzalamağı təklif edir. Tacikistan həmçinin iqtisadi-ticarət əməkdaşlığı üzrə Azərbaycan və Tacikistan arasında hökumətlərarası komissiyanın yaradılması təşəbbüsü ilə çıxış edir. Bu məsələ qarşıdan gələn danışıqlarda müzakirə ediləcək.
R.Dodocanovun sözlərinə görə, hazırda təxminən müxtəlif əməkdaşlıq sahələrində 20-yə qədər ikitərəfli sazişə baxılır. Bunlardan 5-7-nin prezident İ.Əliyevin səfəri çərçivəsində imzalanması planlaşdırılıb. "Digər sənədlər hələ hazırlanacaq", - deyə Tacikistan XİN nümayəndəsi məlumat verib.
Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az
Trend-in ən mühüm və maraqlı xəbərlərini "Telegram"da izləyin
