Azərbaycan, Bakı / Trend müxbir İ.Əlizadə/ Hakim Yeni Azərbaycan Partiyası (YAP) Astara rayon təşkilatının altıncı konfransı keçirilib. Bu barədə YAP mətbuat xidmətindən məlumat verilib.
Təşkilatın sədri Əliheydər Həmzəyev beşinci konfransdan ötən müddət ərzində görülmüş işlər barədə məruzə ilə çıxış edib. O qeyd edib ki, rayon təşkilatı partiyanın proqram vəzifələrinin həyata keçirilməsində, ölkəmizin sosial-iqtisadi inkişafında fəal iştirak edir. Beşinci konfransdan ötən müddət ərzində təşkilatın fəaliyyəti daha da canlanıb, partiya üzvlərinin sayı artaraq 3680 nəfərə çatıb.
Konfransda nəzarət-təftiş qrupunun və mandat komissiyasının da hesabatları dinlənilib.
Yığıncaqda YAP Siyasi Şurasının üzvləri, Milli Məclisin deputatı Mirkazım Kazımov və Kərim Kərimov, rayon icra hakimiyyətinin başçısı Mahir Quliyev çıxış edərək iqtidar partiyasının yaranma tarixindən danışıblar, 2008-ci ildə ölkəmizdə keçiriləcək prezident seçkilərində partiya üzvləri qarşısında duran vəzifələri diqqətə çatdırıblar.
Konfransda rayon təşkilatının 39 nəfərdən ibarət tərkibi təsdiq edilib, Natiq İbadov təşkilatın sədri seçilib.
Sonda konfrans iştirakçıları prezident İlham Əliyevə müraciət qəbul ediblər.
Qeyd edək ki, YAP 1992-ci ildə Naxçıvanda yaradılıb. Partiyanın ilk sədri mərhum eks-prezident Heydər Əliyev olub. 14 ildir ki, hakim partiya olan YAP-ın indiki sədri prezident İlham Əliyevdir.