Azərbaycan, Bakı / Trend müxbir İ.Əlizadə/ Türkiyə Böyük Millət Məclisinin (TBMM) deputatları - Turhan Çöməz, Səlahəddin Beyribəy və Sadiq Yaqub 31 mart-Azərbaycanlıların Soyqırımı ilə əlaqədar martın 27-də "Avropa" otelində keçiriləcək beynəlxalq konfransda iştirak etmək üçün Azərbaycana gələcəklər. Bu barədə məlumat verən tədbirin təşkilatçısı, Azəri-Türk Qadınlar Birliyinin sədri Tənzilə Rüstəmxanlı bildirib ki, konfransda İraq, Türkiyə və Şimali Kpir Türk Respublikasından nümayəndələr iştirak edəcəklər. Konfrans ümumilikdə türklərin 1918-ci ildə məruz qaldığı soyqırım və əsrin sonlarında türədilmiş Xocalı soyqırımını əhatə edəcək.
"Konfransa Türkiyədə fəaliyyət göstərən Erməni İddialarına qarşı Mübarizə Dərnəyinin nümayəndələrini, QHT və mətbuat təmsilçilərini, Türk Tarix Qurumunun başqanını dəvət etmişik", deyə o qeyd edib.
Azərbaycanın millət vəkilləri, elm adamları və qeyri-hökumət təşkilatlarının nümayəndələri konfransda iştirak edəcəklər və onların Türkiyə, İraq və Şimali Kiprdən olan həmkarları ilə görüşləri təşkil olunacaq.