Ukrayna,Kiyev/müxbir Trend Z.Novosvitski/Kiyevdə GUAM iştirakçı dövlətlərinin xarici işlər nazirliklərinin nümayəndələri - ekspertlərinin görüşü baş tutub. Bu barədə Trend in Ukraynadakı xüsusi müxbirinə Ukraynanın Xarici İşlər Nazirliyindən məlumat verilib.
Görüşdə 15-16 mart tarixində Kiyevdə keçirilməsi planlaşdırılan GUAM milli koordinatorlarının iclasında müzakirə olunacaq sənədlərin hazırlanması ilə bağlı məsələlər müzakirə olunub. Növbəti Kiyev sammitindən sonra (2006-cı il) GUAM milli koordintorları Şurasının artıq dördüncü iclasında bir neçə qrup məsələlərin müzakirəsi planlaşdırılıb.
İlk növbədə, bu məsələlər GUAM Birliyinin transformasiyası əsasında yaradılan Demokratiya və İqtisadi İnkişaf Naminə Təşkilatın institusional inkişafı və təşkilati məsələlərdən ibarətdir. İkinci qrupa beynəlxalq və regional təhlükəsizlik və sabitlik, GUAM üzv dövlətlərinin beynəlxalq təşkilatlar, ilk öncə BMT və ATƏT çərçivəsində qarşılıqlı əlaqələri, həmçinin GUAM-ın bu beynəlxalq təşkilatlar və digər dövlətlərlə əməkdaşlığın inkişafı məsələləri daxildir.
GUAM-ın sənaye sahəsində əməkdaşlığın möhkəmləndirilməsi məsələsinə böyük diqqət ayrılacaq. Bu məsələ ilə bağlı artıq onlarla sənaye işçi qrup və yarımqruplar fəaliyyət göstərir. Həmçinin iqtisadiyyat və ticarət, energetika, nəqliyyat, informasiya texnologiyaları, mədəniyyət, elm və təhsil, fövqəladə hallar, turizm, terrorizm, mütəşəkkil cinayətkarlıq və narkotiklərin yayılmasına qarşı mübarizə üzrə sahələrlə bağlı işçi qrup və yarımqruplar fəaliyyət göstərir.
Həmçinin GUAM-ın xarici işlər nazirləri və dövlət başçıları Şurasının (sammit) növbəti iclaslarına hazırlıq ilə əlaqədar aktual məsələlər müzakirə olunacaq. Bu iclasların bu ilin iyun ayında Azərbaycanda keçirilməsi planlaşdırılır.