Azərbaycan, Bakı / Trend , müxbir İ.Əlizadə/ Milli Məclisdə "Dövlət büdcəsindən maliyyələşən təşkilatlarda çalışan işçilərin əmək haqqı haqqında" qanun layihəsi hazırlanır. Bu barədə çərşənbə axşamı Bakıda Milli Məclisin İqtisadi siyasət daimi komissiyasının sədri, millət vəkili Ziyad Səmədzadə məlumat verib.
Onun sözlərinə görə, qanun layihəsi üzərində ciddi iş aparılır. Dövlət büdcəsindən maliyyələşən təşkilatlarda çalışan işçilərin əmək haqqının artırılması qanunla tənzimlənəcək.
"Çünki dövlət büdcəsindən maliyyələşən təşkilatlarda çalışan işçilərin əmək haqqının artırılması adi bir hadisə deyil. Bu tarixi bir qanun layihəsi olacaq" - deyə komissiya sədri əlavə edib.
Səmədzadə deyib ki, Maliyyə Nazirliyi və Hesablama Palatası "Maliyyə nəzarəti haqqında" qanun layihəsi üzərində işləyir. Qanun layihəsi hələlik Milli Məclisə təqdim olunmayıb.
Bundan başqa parlamentin İqtisadi siyasət komissiyasında Rəqabət Məcəlləsi üzərində iş aparılır.