Azərbaycan, Bakı, 22 yanvar / Trend , müxbir İ.Əlizadə/ Sabiq səhiyyə naziri çərşənbə axşamı keçirilən məhkəmə prosesinə gətirilməyib.
Səbayel rayon məhkəməsində sabiq səhiyyə naziri Əli İnsanovun Azərbaycan Milli Elmlər Akademiyasına qarşı iddiası üzrə proses başlayıb.
Azərbaycan Milli Elmlər Akademiyasına üzvlükdən xaric olunmuş sabiq nazir iddia tələbində Ağır Cinayətlərə Dair İşlər üzrə Məhkəmənin cavabdeh kimi cəlb olunmasını, AMEA-nın 4 may tarixli iclasının protokolunun və qərarının, Ağır Cinayətlərə Dair İşlər üzrə Məhkəmənin 30 aprel tarixli məktubunun etibarsız hesab edilməsini, hər iki cavabdehin müştərək qaydada vurulmuş mənəvi zayana görə, 28 milyon manat cərimələnməsi və həmin məbləğin Ağ Ciyər Xəstəlikləri Elmi-Tədqiqat İnstitutuna verilməsi barədə qərar çıxarılmasını, Ağır Cinayətlərə Dair İşlər üzrə Məhkəmənin hakimi Faiq Qasımov barəsində xüsusi qərardad çıxarılması və Məhkəmə-Hüquq Şurasına göndərilməsini istəyib.
İnsanovun vəkili Ağaveyis Şahverdi hüquqlarını müdafiə etdiyi şəxsin prosesdə iştirakının təmin olunması məqsədilə, prosesin təxirə salınması barədə vəsatət verib.
Səbayel rayon məhkəməsinin hakimi Fuad İsmayılov vəsatəti təmin etməyib və qeyd edib ki, İnsanovun vəkili prosesdə iştirak etdiyi üçün və onun prosesdə iştirakını zəruri edən amillər olmadığından, proses davam etdirilməlidir.
Səbayel rayon məhkəməsinin 7 yanvar tarixli iclasında vəkilin İnsanovun prosesdə iştirakının təmin olunması barədə vəsatəti təmin olunub. Məhkəmə həmin qərarın, məhkəmənin keçiriləcəyi tarix barədə məlumatın İnsanovun cəza çəkdiyi 10 saylı müəssisənin rəhbərliyinə göndərildiyini bildirib.
Proses yanvarın 31-də şahid ifadəsi ilə davam etdiriləcək.
Dövlət çevrilişinə cəhd, kütləvi iştişaşlara hazırlığa görə 2005-ci ilin oktyabrında həbs olunmuş sabiq səhiyyə naziri bu il məhkəmənin hökmü ilə korrupsiya cinayətlərində təqsirli bilinərək, əmlakı müsadirə olunmaqla, 11 il azadlıqdan məhrum edilib.
