Azərbaycan, Bakı, 14fevral / Trend , müxbir A. Salmanov/ Ötən il Bakıda çoxsaylı insan ölümü ilə nəticələnən bina uçqununda günahkar bilinənlərin məhkəməsi davam etdirilib.
Binanın memarı Eldar Rəhimov baş verən hadisədə özünü təqsirli olmadığını bildirib. Memar deyib ki, inşa olunan on altı mərtəbəli yaşayış binası sütunların normadan az olmasından və yüklənmədən uça blməzdi. Rəhimov binanın inşası zamanı yol verilən qüsurlarla bağlı Əli Muradovu məlumatlandırıb. "O, mənə sütünların sonradan bərpa ediləcəyini deyirdi",-deyə memar bildirib.
2007-ci il avqustun 28-də Bakının Yasamal rayonu, Murtuza Muxtarov, 185 ünvanında hündür mərtəbəli binanın uçması nəticəsində 25 nəfər həlak olub, 3 nəfər xəsarət alıb.
Hadisə ilə əlaqədar "Mütəfəkkir" tikinti şirkətinin rəhbəri Əli Muradov, iş icraçıları Əsgər Əliyev, Fərhad Həsənov, Qədir Səlimov Əliyev, Bakı şəhər İcra Hakimiyyətinin Mənzil Kooperativ Təsərrüfatı İdarəsinin rəisi Akif Məhərrəmov həbs olunub .
Muradov kəskin ürək çatışmazlığından ötən il noyabrın 19-da həbsxanada dünyasını dəyişib və cinayət işinin onunla bağlı hissəsinə xitam verilib.
Proses fevralın 15-də davam etdiriləcək.
