Azərbaycan, Bakı, 17 mart / Trend , müxbir K.Ramazanova / Azad söz üzrə ATƏT-in nümayəndəsi Mikloş Haraşti Azərbaycanın müxalifət qəzeti olan "Azadlıq" qəzetinin jurnalistinə hücum faktını qınayır və hökuməti bu hadisənin aradırmasına çağırır.
"Mən prezident administrasiyasını jurnalistə hücum edənlərin mühakimə edilməsi vədlərini dəstəkləyirəm"-deyə Haraşti bildirib. O hesab edir ki, araşdırmalar təkcə ədalət üçün deyil, "jurnalistə hücumun Azərbaycanın bir neçə müstəqil qəzetindən biri olan "Azadlıq" qəzetinə kampaniyanın bir hissəsi olduğunu" aydınlaşdırmaq üçün zəruridir"-Haraştinin bazar ertəsi yayılmış məlumatında deyilir.
Martın 13-də, axşam saat 8-də "Azadlıq" qəzetinin jurnalisti Aqil Xəlilə ürək nahiyəsindən naməlum şəxslər tərəfindən bıçaq zərbəsi vurulub. Jurnalist Mərkəzi Kliniki Xəstəxanaya çatdırılıb və üzərində əməliyyat aparılıb. Faktla bağlı cinayət işi qaldırılıb.
"Hökumətin jurnalistlərə zorakılığı ilə bağlı uğursuz araşdırmaları, belə cinayətlərin təkrarını artırır"-deyə Haraşti bildirib.
Onun sözlərinə görə, beynəlxalq cəmiyyət və Azərbaycandakı jurnalistlər 2005 -ci ildə jurnalist Elmar Hüseynovun qətli və son illər baş verən, jurnalistlərə çoxsaylı basqınlarla bağlı araşdırmaların konkret nəticəsini hələ də gözləyirlər. Bu cinayətlər indiyə qədər cəzalandırılmayıb.