Azərbaycan, Bakı, 30 mart/ Trend , müxbir İ.Əlizadə/ Azərbaycanda mətbuat nümayəndələrinin həbsinə etiraz olaraq aclıq aksiyası keçirən jurnalistlər həbsxanada aclığa başlayan "Gündəlik Azərbaycan" və "Realnıy Azerbaydjan" qəzetlərinin baş redaktoru Eynulla Fətullayevə aksiyanı dayandırmaq üçün müraciət ediblər. "Həbsxana şəraitində aclıq aksiyası keçirmək çətindir və sağlamlığa ciddi zərər vurur. Ona görə də biz aclıq aksiyasını dayandırmaqla bağlı Eynulla Fətullayevə müraciət etmişik. İstəyirik ki, Eynulla Fətullayev aksiyanı dayandırsın və azadlıqda olan jurnalistlər, qeyri-hökumət təşkilatlarının nümayəndələri aclığı davam etdirsinlər", - deyə bazar günü Trend a açıqlamasında "Gündəlik Azərbaycan" qəzetinin şef-redaktoru Şahvələd Çobanoğlu bildirib.
12 saylı Cəzaçəkmə Müəssisəsində saxlanılan "Gündəlik Azərbaycan" və "Realnıy Azerbaydjan" qəzetlərinin baş redaktoru Eynulla Fətullayev martın 26-dan həbsdə aclığa başlayıb. Baş redaktor işinə ədalətli və qərəzsiz baxılmasını, həbsdə olan həmkarlarının azadlığa çıxmasını tələb edir, Avropa Şurası və ATƏT-in siyasi məhbus məsələsində konkret müdafiə mexanizmləri ortaya qoymasını istəyir.
Fətullayevə dəstək məqsədilə "Yeni Müsavat" qəzetinin redaksiyasında "Gündəlik Azərbaycan" qəzetinin şef-redaktoru Şahvələd Çobanoğlu, qəzetin əməkdaşı Aynur Elgünəş, "Yeni Müsavat" qəzetinin redaktoru Zahid Səfəroğlu və qəzetin əməkdaşı Elşən Balaxanlı, "Bizim yol" qəzetinin əməkdaşı Natiq Cavadlı, Demokratik Gənclər Hərəkatının sədri Ağasif Şakiroğlu dörd gündür aclıq aksiyası keçirirlər.
Çobanoğlunun sözlərinə görə, etiraz aksiyası keçirən jurnalistlərin vəziyyəti normaldır: "Aksiya iştirakçılarında baş ağrıları, halsızlıq və qan təzyiqinin aşağa düşməsi müşahidə olunur. Bu da aclıq keçirən insanlar üçün xarakterik haldır. Amma ciddi problemlər yoxdur. Aksiya iştirakçıları həkim nəzarəti altındadır".
Fətullayev Cinayət Məcələsinin terororçuluqla hədələmə (214.1-ci), qulluq möveyindən istifadə etməklə milli, irqi, sosial və ya dini düşmənçiliyin salınması (283.2.2-ci) və vergidən yayınma(213.2.2) maddələri ilə təqsirli bilinərək, məhkəmənin hökmü ilə 8 il 6 ay azadlıqdan məhrum edilib.
Azərbaycanda peşə fəaliyyəti ilə bağlı 3 jurnalist - "Azadlıq" qəzetinin baş redaktoru Qənimət Zahid, onun qardaşı, qəzetin əməkdaşı Mirzə Sakit və "Gündəlik Azərbaycan" və "Realnıy Azerbaydjan" qəzetlərinin baş redaktoru Eynulla Fətullayev həbsdədir.
