Azərbaycan, Bakı, 30 mart / Trend , müxbir E.Hüseynli/ Azərbaycan Ekologiya və Təbii Sərvətlər Nazirliyi (ETSN) Daşkəsən rayonunun meşəətrafı ərazilərindəki yanğının səbəbini açıqlayıb. Nazirliyin mətbuat xidmətinin rəhbəri vəzifəsini icra edən İradə İbrahimova Trend -a bildirib ki, ilkin araşdırmalara görə, yanğın meşəətrafı ərazilərdə vətəndaşların odla ehtiyatsızlığı üzündən baş verib.
Martın 26 - da davam edən isti və yağmursuz hava şəraiti ilə müşayiət olunan güclü quru küləklər nəticəsində Daşkəsən Meşə Mühafizəsi və Bərpası Müəssisəsinin Dəstəfur meşəbəyliyinin 4 saylı dolayı ərazisində yanğın baş verib. Hadisə ilə bağlı Daşkəsən Meşə Mühafizəsi və Bərpası Müəssisəsində yaradılmış yanğınla mübarizə dəstələri, həmçinin, qonşu Xanlar və Gədəbəy MMBM-nin meşə mühafizə xidməti səfərbər edilərək, ərazini nəzarətə götürüb, yanğının daha geniş ərazilərə yayılmasının qarşısını almaq üçün ilkin mübarizə tədbirlərinin həyata keçirilməsini təmin ediblər.
Yanğın ocağının mart 27-də günün ikinci yarısında meşə mühafizə xidmətinin, Fövqəladə Hallar Nazirliyinin aidiyyəti qurumlarının və yerli əhalinin iştirakilə tamamilə söndürülüb.
İbrahimova deyib ki, yanğın nəticəsində meşəaltı ölü örtük və quru ot örtüyü yanmaqla, seyrəkliklərdə mövcud olan kolluqlara və ucqar ərazilərdəki tör-töküntüyə qismən ziyan dəyib.
Maddi itkilərin dəqiqləşdirilməsi və müvafiq tədbirlərin görülməsi məqsədilə komissiya yaradılıb və müvafiq tapşırıqlar verilib.
Onun sözlərinə görə, Lerik, Yardımlı, Gədəbəy, Quba, Qusar və İsmayıllı rayonları ərazilərindəki meşə və digər yaşıllıqlarda da müxtəlif intensivli yanğın ocaqları qeydə alınıb və yanğının daha geniş ərazilərə yayılmasının qarşısının alınması üçün ilkin mübarizə tədbirləri həyata keçirilib.