Azərbaycan, Bakı, 25 aprel / Trend , müxbir Q.Cəbiyev/ Azərbaycan Prezidentinin İcra Aparatının ictimai-siyasi şöbəsinin müdiri Əli Həsənov "Lider" telekanalında müxalifət liderinin şərəf və ləyaqətini təhqir edən verilişlərin gedilməsini pisləyib. "Hakimiyyət onun tərəfdarıdır ki, elektron KİV-lərdə, ictimai rəyi formalaşdıran mediada işləyən jurnalistlər Əxlaq Kodeksi çərçivəsində fəaliyyət göstərməlidirlər" cümə günü jurnalistlərə Həsənov bildirib.
"Lider" telekanalı müxalif Xalq Cəbhəsi Partiyasının (AXCP) sədri Əli Kərimlinin şərəf və ləyaqətini təhqir edən verilişlər verib. AXCP bununla bağlı "Lider"i məhkəməyə verəcəyini bildirib.
Həsənov deyib ki, heç bir jurnalist digər insanların şərəf və ləyaqətini təhqir etməməlidir.
Müxalifəti təmsil edən AXCP hazırda "Azadlıq" siyasi blokunun üzvü və həmtəsisçisidir. Partiyanın qurucusu və 2000-ci ilə qədər sədri Azərbaycanın eks-prezidenti mərhum Əbülfəz Elçibəy olub. 2000-ci ildən indiyədək AXCP-yə keçmiş dövlət katibi, sabiq deputat Əli Kərimli sədrlik edir.
Məqalə müəllifi ilə əlaqə ünvanı: [email protected]