Azərbaycan, Bakı, 06 İyun / Trend , müxbir K.Zərbalıyeva/ Bakı Dövlət Universiteti "Müxalifət" qəzetinin redaktorunun əlavə təhsil almaq üçün sənədlərini qəbul etməkdən imtina edib.
Universitet rəhbərliyi Yaşar Ağazadənin 2007-ci ildə siyasi əsaslarla həbsdə olduğunu əsas gətirərək sənədlərini qəbul etməyib.
Ağazadə təhsil nazirinin 7 avqust 1996-cı il tarixli əmri ilə təsdiq edilmiş "Əlavə ali (orta) ixtisas təhsili almaq haqqında" Əsasnaməyə və Bakı Dövlət Universitetinin 3 iyun 2008-ci il tarixli "Azərbaycan" qəzetində dərc etdiyi elana uyğun olaraq əlavə təhsil almaq üçün 5 iyun 2008-ci il tarixdə sənədlərimi BDU-ya təqdim edib.
Sənədlərin qəbuluna məsul olan rektorun köməkçisi Məzahir Sultanov jurnalistin Əsasnaməyə və BDU-nun elanına uyğun olaraq təqdim etdiyi sənədləri qəbul etməyib və onun həbsdə olduğunu əsas gətirərək hüquqşünasla məsləhətləşəcəyini bildirib.
Universitetin hüquqşünası Tofiq Sadıqov da Ağazadənin həbsdə olduğunu əsas gətirərək əlavə təhsil üçün sənəd verə bilməyəcəyini diqqətə çatdırıb.
KİV nümayəndələrinə ünvanladığı müraciətində Ağazadə iyunun 5-i və 6-da sənədlərinin qəbul edilməməsini universitetin rektoru Abel Məhərrəmovun ona qarşı qərəzli münasibətinin nəticəsi kimi qiymətləndirib.
"2006-cı ildə də sənədlərimin qəbulundan imtina edilib və bu, Məhərrəmov haqqında işlədiyim qəzetdə məqalələr yazmağımla əlaqələndirilib", - deyə jurnalist müraciətində vurğulayıb.
Jurnalist hesab edir ki, rektorun köməkçisinin və universitetin hüquqşünasının onun sənədlərinin qəbulundan imtina etmələri üçün heç bir qanuni əsasları yoxdur. "Belə ki, şəxsin həbsdə olması onun təhsil almaq hüququna mane ola bilməz", - deyə Ağazadə bildirib.
Ağazadə BDU-nun rektoru Məhərrəmova qarşı vəzifəli şəxsin hərəkətinin qanunsuz hesab olunması barədə iddia ərizəsi ilə məhkəməyə müraciət etməyə hazırlaşır.
Ağazadə ötən ilin mayında millət vəkili Cəlal Əliyevin xüsusi ittiham qaydasında şikayəti əsasında təhqir və böhtan cinayətlərində təqsirli bilinərək 2 il 6 ay müddətinə azadlıqdan məhrum edilib.
Ağazadə ötən ilin dekabrında prezidentin fərmanı ilə əfv olunub.
Müəlliflə əlaqə saxlamaq üçün elektron ünvan - [email protected]