Azərbaycan, Bakı, 23 iyun/ Trend , müxbir C.Babayeva/ Dünya Azərbaycanlıları Konqresinin (DAK) həmsədri Firudin Pərvizniya Bakıda rəsmi və qeyri-rəsmi görüşlər keçirmək və Quzey və Güney Azərbaycanla bağlı keçiriləcək müxtəlif tədbirlərdə iştirak etmək üçün Azərbaycanda səfərdədir. Bu barədə Trend -a bazar ertəsi DAK-ın Mətbuat və İnformasiya Xidmətindən məlumat verilib.
Trend -un arayışı: DAK daxilində yaranmış narazılıqlar nəticəsində İdarə Heyəti (İH) iki yerə bölünüb. İH-nin 16 nəfər üzvündən 11-i Sabir Rüstəmxanlını DAK-ın sədri seçib. İH-nin qalan üzvləri və tərəfdarları Qulamrza Səbri Təbrizinin sədrliyini dəstəkləyir və iyunun 21-23-də Brüsseldə Avropa Parlamentində qurultay keçirir. Sabir Rüstəmxanlının həmsədrlik etdiyi DAK-ın iyunun 6-8-də Almaniyanın Köln şəhərində keçirilən qurultayında 25 ölkədən 300-dək nümayəndə və qonaq iştirak edib. Qurultayda DAK-ın Nizamnaməsi və Məramnaməsinə dəyişikliklər qəbul olunub. DAK-da həmsədrlik institutu yaradılıb, Sabir Rüstəmxanlı və Firudin Pərvizniya DAK-ın həmsədrləri seçilib. Qulamrza Səbri Təbrizi Köln qurultayını qeyri-legitim hesab edib.
DAK 1997-ci ildə ABŞ-da yaradılıb. Təşkilat əsasən Güney Azərbaycanın istiqlaliyyəti uğrunda mübarizə aparır.
Məlumata əsasən, Pərvizniya iyulun 1-də Güney Azərbaycanda Babəkin ad günü ərəfəsində hər il təşkil olunan Bəzz qalasına yürüş-mitinqinə dəstək olaraq Azərbaycan bölgələrinin birində təşkil olunacaq tədbirə qatılacaq.
Trend -un arayışı: Hər il Güney Azərbaycanda iyunun sonu, iyulun əvvəlində Bəzz qalasına yürüş təşkil edilir. İran hökuməti hər il yürüşün qarşısını alır.
Məqalə müəllifi ilə əlaqə ünvanı: [email protected]