Azərbaycan, Bakı, 01 iyul / Trend , müxbir K.Zərbalıyeva/ Azərbaycanda məhkəmələr yetkinlik yaşına çatmayanlar barədə cinayət işlərinə baxarkən müəyyən qüsurlara yol verir.
Ali Məhkəmə yetkinlik yaşına çatmayanlar tərəfindən törədilmiş cinayətlərə dair işlər üzrə məhkəmə təcrübəsinin ümumiləşdirilməsini aparıb.
Trend -un məlumatına görə, ümumiləşdirmə zamanı məhkəmələrin yetkinlik yaşına çatmayanlar tərəfindən törədilmiş cinayət işlərinə baxarkən bu sahədə qanunvericiliklə müəyyənləşdirilmiş normalara əsasən əməl etdikləri müəyyən olunsa da, bəzi qüsurlar da aşkar edilib.
Bu qüsurlar isə yeniyetmələrin həyat və tərbiyə şəraitinin kifayət qədər araşdırılmaması, onlar tərəfindən cinayətin törədilməsinə imkan verən səbəb və şəraitin aşkar edilməməsidir.
Ali Məhkəmənin Plenumunda aparılmış ümumiləşdirmə müzakirə olunub və müvafiq qərar qəbul olunub.
Məlumata görə, respublika üzrə 2005-ci ildə ümumi məhkum edilənlərin 2,4 faizi yetkinlik yaşına çatmamış şəxslər olub.
2006-cı və 2007-ci illərdə bu rəqəm azalıb və müvafiq olaraq 1,6 və 1,7 faiz təşkil edib. Bu, Müstəqil Dövlətlər Birliyi ölkələri arasında ən aşağı göstəricidir.
Plenumda Ali Məhkəmənin 2008-ci ilin ikinci yarısına dair iş planı təsdiq edilib.
Həmçinin konkret cinayət və mülki işlərə də baxılıb.
Məqalə müəllifi ilə əlaqə ünvanı: [email protected]
