Azərbaycan, Bakı, 14 iyul / Trend , müxbir K.Zərbalıyeva/ Azərbaycanın şimalında - Quba rayonu ərazisində ötən il aşkarlanmış kütləvi insan məzarlığının ərazisində muzey yaradılacaq.
AMEA-nın Arxeologiya və Etnoqrafiya İnstitutunun elmi işşisi, Quba arxeoloji ekspedisiyası komissiyasının rəhbəri Qəhrəman Ağayev jurnalistlərə bildirib ki, məzarlığın abidə muzeyi kimi qorunub saxlanması nəzərdə tutulub. Artıq bununla bağlı ekspedisiya komissiyası təkliflərini aidiyyatı qurumlara təqdim edib.
Komissiyanın rəhbəri bildirib ki, təkliflərdə insanların kütləvi basdırıldığı quyu şüşənin işərisinə salınacaq. Üzərinə isə oval şəkilli güzgü quraşdırılacaq.
Bununla ərazini müşahidə edən şəxs kənardan quyunu, güzgüdə isə quyunun işərisini görə biləcək.
Qalan ərazidəki ayrı-ayrı epizodlar isə akvarium formasına salınacaq. Ağayev bildirib ki, ərazidəki hər bir sahədə basdırılanların sayı, onların necə öldürülməsi, basdırılanların qadın, uşaq, kişi olması barədə məlumatlar əks olunacaq.
Məzarlığın girişində onun tarixi, aşkar edilmə vaxtı, yerli əhalinin hadisə barədə söylədikləri müxtəlif dillərdə qeyd olunacaq.
Ərazinin hündür hissəsində isə ətrafa spesifik səsyayma qabliyyəti olan soyqırım abidəsi qoyulacaq.
2007-ci il aprelin ortalarında Quba şəhər stadionunun tikintisi zamanı kütləvi insan məzarlığı aşkarlanıb. Ekspertlər müəyyən ediblər ki, burada insanların nizamsız şəkildə dəfn olunması və digər amillər onların 1918-ci ildə ermənilərin soyqırımına məruz qaldığını sübuta yetirib. İndiyə qədər 195 insana məxsus qalıq aşkarlanıb.
Quba paytaxt Bakıdan 170 kilometr şimalda yerləşir.
Məqalə müəllifi ilə əlaqə ünvanı: [email protected]
