Azərbaycan, Bakı, 14 avqust / Trend , müxbir C.Babayeva/ Azərbaycan Prezidenti yanında Qeyri-Hökumət Təşkilatlarına Dövlət Dəstəyi Şurasının elan etdiyi ilk qrant müsabiqəsində gənclər təşkilatlarının təqdim etdiyi layihələrin maliyyələşməsi ölkə gənclərinin sayına proporsional deyil. Bu barədə cümə axşamı Trend -a Şuranın üzvü "İrəli" Ümumrespublika Gənclər Hərəkatının həmtəsisçisi Ceyhun Osmanlı bildirib.
Trend -un arayışı: Azərbaycan prezidenti İlham Əliyev aprelin 16-da Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurası üzvlərinin təyin edilməsi haqqında Sərəncam imzalayıb.
Prezidentinin 2007-ci il 13 dekabr tarixli Fərmanı ilə təsdiq edilmiş "Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurası haqqında Əsasnamə"yə uyğun olaraq 11 nəfərdən ibarət tərkibdə fəaliyyət göstərəcək Şura üzvlərindən 3-ü dövlət orqanlarının nümayəndələrindən, 8-i isə Qeyri-Hökumət Təşkilatlarının irəli sürdüyü namizədlərdən təyin edilib.
Şuranın QHT-lər üçün elan etdiyi ilk müsabiqəyə dövlət büdcəsindən 1,5 milyon manat vəsait ayrılıb. Onun 200 min manatı Şuranın təşkilati məsələlərinə sərf olunub, 1 mln. 300 min manat isə müsabiqəyə təqdim olunan layihələrə ayrılıb. İlk müsabiqə iyunun 12-də elan olunub və iyulun 12-də başa çatıb. Müsabiqədə qalib gələn 192 QHT-nin adları avqustun 14-də elan olunub.
Osmanlının bildirdiyinə görə, o, gənclər təşkilatlarına daha çox maliyyə dəstəyinin ayrılmasının tərəfdarıdır. "Şurada gənclər təşkilatlarına daha çox maliyyə dəstəyi göstərilə bilərdi", - deyə o bildirib.
Onun sözlərinə görə, qrant müsabiqəsində gənclər təşkilatları çox fəal iştirak ediblər. "Bir çox gənclər təşkilatlarının layihələri müsabiqədə qalib gələrək maliyyələşib. Gənclər təşkilatlarının təqdim etdiyi layihələr əsasən beynəlxalq əlaqələr, səhiyyə, ekologiya, qaçqın və məcburi köçkünlərlə bağlı istiqamətlərdə olub", - deyə o bildirib.
Məqalə müəllifi ilə əlaqə ünvanı: [email protected]
