Azərbaycan, Bakı, 22 sentyabr / Trend , K.Zərbalıyeva/ Azərbaycan məhkəməsi Böyük Britaniya şirkətinin Azərbaycanda fəaliyyət göstərən nümayəndəliyində, hamilə olduğu üçün işdən azad olunmuş qadının işə bərpası barədə qərar qəbul edilib.
Rəna Əliyeva bu ilin fevralından "Baker Filly Azerbaijan" şirkətində kadrlar idarəsinin rəhbəri vəzifəsində çalışıb və 600 manat əmək haqqı alıb. Şirkətin rəhbərliyi bu il iyunun 8-də qadının hamilə olduğunu biləndən sonra onun vəzifəsini ixtisar edib və Əliyevanı işdən çıxarıb.
Əliyevanın vəkili İradə Cavadova bildirib ki, şirkət rəhbərliyi xərclərinin artmasını əsas gətirərək, Əliyevanın tutduğu vəzifənin ixtisar olunduğunu iddia edir.Vəkilin sözlərinə görə, əslində, əsas səbəb xanımın hamilə olması olub.
Əliyeva hamilə olduğuna görə işdən azad olunduğunu biləndən sonra səhhəti pisləşdiyindən, bir neçə gün işə çıxa bilmir. Müalicə olunması ilə bağlı işə çıxmaması barədə arayış təqdim edəndə, şirkət rəhbərliyi Əliyevanın iyunun 9-dan işdən çıxarıldığını bildirir.
Əliyeva Bakının Yasamal rayon məhkəməsinə işinə bərpa olunması, işləmədiyi günlərin əmək haqqının, vurulmuş mənəvi ziyanın və məhkəmə xərclərinin ödənilməsi barəsində şirkətə qarşı iddia qaldırır. İddiaçı şirkət rəhbərliyinin qanunsuz hərəkətlərinin araşdırılması barədə məhkəmənin xüsusi qərardad çıxarılmasını da tələb edib.
Bakının Yasamal rayon məhkəməsi Əliyevanın iddiasını qismən təmin edib.
İddiaçının vurulmuş mənəvi zərərin ödənilməsi və şirkət rəhbərliyi barəsində xüsusi qərərdadın çıxarılması ilə bağlı tələbləri təmin olunmayıb.
Vəkil bildirib ki, məhkəmə qətnamənin dərhal icraya yönəldilməsi barədə xüsusi qərardad çıxarıb. Cavadova deyib ki, qətnamə icra olunmayacağı halda, şirkət rəhbərliyinə qarşı cinayət işi başlana bilər.
Müəlliflə əlaqə saxlamaq üçün elektron ünvan- [email protected]
