Azərbaycan, Bakı 03 noyabr / Trend müxbir K.Zərbalıyeva/ Azərbaycanda son illər mənəvi zərərin ödənilməsi ilə bağlı iddiaların sayı xeyli artıb.
Bu barədə Ali Məhkəmənin Plenumunun bazar ertəsi keçirilən iclasında "Mənəvi zərərin ödənilməsi barədə qanunvericiliyin məhkəmələr tərəfindən tətbiqi haqqında" məsələnin müzakirəsi zamanı məlumat verilib.
Bildirilib ki, Azərbaycan qanunvericiliyində mənəvi zərər anlayışının, onun tətbiqi əsaslarının, hesablanma qaydasının mükəmməl müəyyən edilməməsi bu qəbildən olan işlərə baxıldıqda müəyyən çətinliklər yaradır. Plenumun iclasında bu problemlə əlaqədar məhkəmələrə izahlar verilməsi məqsədəmüvafiq sayılıb.
Ali Məhkəmənin sədri Ramiz Rzayevin sədrliyi ilə keçirilən Plenumda konkret cinayət və mülki işlərə də baxılıb və müzakirə olunan məsələ və baxılan işlər barədə müvafiq qərarlar qəbul olunub.
Müəlliflə əlaqə saxlamaq üçün elektron ünvan- [email protected]
