Azərbaycan, Bakı, 19 dekabr / Trend , müxbir A. Hüseynbala/ Azərbaycanın Mətbuat Şurası 2008 - ci ili mətbuat üçün uğurlu hesab etmək olar.
" Əvvəlki illərlə müqayisədə, 2008 - ci ildə jurnalistlərin müxtəlif təzyiqlərə məruz qalması, informasiya əldə etməsi ilə bağlı çətinliklər az olub", - cümə günü Trend - a Azərbaycanın Mətbuat Şurasının sədri Əflatun Amaşov bildirib.
Trend - un arayışı: Azərbaycanda 3300 - dən çox kütləvi informasyia vasitəsi qeydiyyatdan keçib. Hazırda onlardan 600 - ə yaxını fəaliyyət göstərir. Təxminən 400-dək qəzet və jurnal dərc olunur, 20 -yə yaxın telekanal fəaliyyət göstərir. Azərbaycanda 50 -yə yaxın elektron KİV, təxminən 20 informasiya agentliyi var. Qalanları internet resurslarıdır.
Şura sədri reket jurnalistikası ilə mübarizədə uğurların əldə edildiyini deyib.
"Şuranın nəzdində reket jurnalistikası ilə bağlı komissiya yaradılıb. İlin sonunda reket qəzetlərin bir qrupunun siyahısını açıqlayacağıq. Reket jurnalistikası azalır, amma proses hələ də bizim istədiyimiz səviyyədə getmir. Problem maliyyə mənbələrinin zəif olması ilə bağlıdır. Ona görə fəaliyyətləri üçün müəyyən gizli yollar axtarır, bəzi ictimai - siyasi qurumlar və iş adamları ilə əlaqə qururlar", - Amaşov əlavə edib.
Onun sözlərinə görə, 2008 - ci ilin yadda qalan faktlardan biri də məhkəmədə qəbul olunan cərimələrin ləğvidir.
"Prezident seçkisi ərəfəsində Mətbuat Şurasının təşəbbüsü ilə müxalifyönlü bir neçə qəzetin dondurulmuş hesablarının açılmasına nail olduq", - Amaşov bildirib.
Mətbuat Şurası həbsdə olan jurnalistlərin azadlığa buraxılacağına ümid etdiyini deyib.
"Həbsxanada olan jurnalistlərin taleyi bizi narahat etdiyindən, onların azadlığa buraxılması üçün Əfv Komissiyasına müraciət etmişik. Mənə elə gəlir ki, yaxın müddətdə biz buna nail olacağıq", - Mətbuat Şurasının sədri qeyd edib.
Amaşov deyib ki, bu il Mətbuat Şurası Mətbuata Yardım Fondunun yaradılması ilə bağlı sənədləri hazırlayaraq, Prezidentin İcra Aparatına təqdim edib.
Məqalə müəllifi ilə əlaqə ünvanı: [email protected]
