Azərbaycan, Bakı, 19 yanvar / Trend , müxbir K.Zərbalıyeva/ Vətənə xəyanətdə təqsirli bilinərək, 10 il azadlıqdan məhrum edilmiş "Talışın səsi" (Tolışi sədo) qəzetinin baş redaktoru cərimə təcridxanasına salınıb.
Novruzəli Məmmədovun Hüquqlarını Müdafiə Komitəsinin sədri Hilal Məmmədov bazar ertəsi Trend -a bildirib ki, baş redaktor daxili nizam-intizam qaydalarını pozduğundan, 15 sutka müddətinə cərimə təcridxanasına salınıb.
Komitə, Məmmədovun səhhətinin ağır olduğunu nəzərə alaraq, qeyd olunan hadisədən narahatlıq bildirir.
Penitensiar Xidmətin ictimaiyyətlə əlaqələr şöbəsindən məlumatla bağlı münasibət öyrənmək mümkün olmayıb.
Azərbaycan Milli Elmlər Akademiyası Dilçilik İnstitutunun sabiq bölmə müdiri, "Tolişi sədo" qəzetinin baş redaktoru Novruzəli və qəzetin məsul katibi Elman Quliyev 2007-ci ilin fevralında həbs olunublar.
Məhkəmənin hökmü ilə Məmmədov 10, Quliyev 6 il müddətinə azadlıqdan məhrum ediliblər.
Onlar Cinayət Məcəlləsinin dövlətə xəyanət (274) və milli, irqi, dini düşmənçilik yayma (283) maddələri ilə ittiham olunublar.
Məmmədov bu il yanvarın 14 - də Bayıldakı 1 saylı İstintaq Təcridxanasından 15 saylı cəzaçəkmə müəssisəsinə köçürülüb.
Məqalə müəllifi ilə əlaqə ünvanı: [email protected]