Azərbaycan, Bakı, 11 fevral / Trend , müxbir A. Hüseynbala/ Azərbaycanda 2008-ci ildə dini dözümsüzlüyü və ayrıseçkiliyi təbliğ edən 59 adda kitabın ölkəyə idxalının və yayılmasının qarşısı alınıb.
"Ötən il 102 dini icma dövlət qeydiyyatından keçib və beləliklə ölkədə fəaliyyət göstərən dini qurumların sayı 533-ə çatıb", - çərşənbə günü Trend -a Dini Qurumlarla İş üzrə Dövlət Komitəsindən bildirilib.
2008-ci ildə qeydiyyata alınan dini icmaların 101-i islam, biri isə qeyri-islam təmayüllü, Sumqayıt şəhərində fəaliyyət göstərən "Kübar" yəhudilər dini icmasıdır. "Əvvəlki illərin statistikasının təhlili son vaxtlar ölkəyə zərərli dini ədəbiyyatın idxalının və yayılmasının azaldığını göstərir. Bu faktı komitədə ekspertizadan keçirilən dini kitabların arasındakı zərərli dini ədəbiyyatın sayı da təsdiqləyir", - DQİDK-nın məlumatında qeyd edilir.
Komitənin məlumatına görə, ölkədə fəaliyyət göstərən aparıcı nəşriyyatların rəhbərləri ilə görüşlər keçirilib və zərərli dini ədəbiyyatın nəşr olunub yayılmasının qarşısının alınması məqsədilə birgə fəaliyyətlə bağlı məsələlər müzakirə olunub. "Ölkədə dini duruma nəzarət daha da gücləndirilib, dini qurumların qeydiyyatı prosesi sürətləndirilib, qeyri-qanuni dini icmaların və təriqətlərin missonerlik fəaliyyətinin qarşısı alınıb, dini təyinatlı obyektlərin, eləcə də xaricdə dini təhsil alan gənclərin məlumat fondunun yaradılması sahəsində müsbət nəticələr əldə edilib", - məlumatda vurğulanır.
Məqalə müəllifi ilə əlaqə ünvanı:[email protected]