Azərbaycan, Bakı, 23 aprel / Trend , müxbir D.İbrahimova /
Avropa Gənclər Fondu (AGF) Azərbaycanın gənclər təşkilatlarına dəstək göstərməyə hazırdır. Bu barədə cümə axşamı Bakıda jurnalistlərə AGF-nin rəhbəri Jan Klod Lazzaro bildirib.
Onun sözlərinə görə, son vaxtlar Azərbaycanın bir çox gənclər təşkilatı fond ilə əməkdaşlıq edir və ötən il ölkənin qeyri-hökumət təşkilatları Fransadan təqribən 17 qrant alıb.
Avropa Gənclər Fondunun rəhbəri yerli səviyyədə gənclər təşkilatlarının işini müsbət qiymətləndirib.
O bildirib ki, fond gənclər təşkilatlarına jurnalistika sahəsində dəstək göstərir və gələcəkdə də bu kimi layihələrə yardım göstərməyə hazırdır.
"QHT-lər bizə təkliflər təqdim etməlidir və biz onlara baxdıqdan sonra dəstək barədə qərar qəbul edirik", - deyə Lazzaro vurğulayıb.
Avropa Gənclər Fondunun rəhbəri səfər çərçivəsində Azərbaycanın QHT nümayəndələri ilə görüşlər keçirib.