Azərbaycan, Bakı, 15 may / Trend , K. Zərbalıyeva /
Avropa İnsan Hüquqları Məhkəməsi ilə Azərbaycan Hökuməti arasında ədalətli məhkəmə araşdırması hüququnun pozuntusu ilə bağlı kommunikasiya başlayıb.
Ərizəçinin hüquqlarının Avropa Məhkəməsində müdafiəsini həyata keçirən İntiqam Əliyev cümə günü Trend -a məlumat verib.
Ərizəçi Gəncə Dövlət Universitetinin professoru, Musavat Partiyasının Gəncə şəhər şöbəsinin sədri Cahangir Əmirov 28 aprel 2003-cü ildə polisləri təhqir etməsi əsası ilə tutulub.
Həmin tarixdə Nizami Rayon Məhkəməsi İnzibati Xətalar Məcəlləsinin 310-cu maddəsinə əsaslanaraq ərizəçinin sərxoş vəziyyətdə polis əməkdaşlarını təhqir etməsi əsası ilə ona 13 günlük inzibati həbs kəsib.
Tutulmadan sonra, o, Əmək Məcəlləsinin məhkum olunmuş şəxslərin işdən çıxarılmasını nəzərdə tutan 74-cü maddəsinin "ç" bəndinə əsasən, Gəncə Dövlət Universitetinin 30 aprel 2003-cü il tarixli qərarı ilə işdən çıxarılıb.
Əmirov Məhkəməyə İnsan hüquq və azadlıqları haqqında Avropa Konvensiyanın 6-cı maddəsi ilə təminat verilən ədalətli məhkəmə araşdırması hüququnun pozulması barədə şikayət verib. O hesab edir ki, Apellyasiya Məhkəməsi tərəfindən onun işdən çıxarılması əsasının dəyişdirilməsi, o cümlədən Ali Məhkəmənin iclasının yeri və tarixi barədə məlumatlandırılmaması, siyasi fəaliyyətinə görə milli məhkəmələr tərəfindən ona qarşı ayrıseçkiliyə yol verilməsi Konvensiya ilə təminat verilən ədalətli məhkəmə araşdırması hüququnu pozub.
O, qanunsuz işdən çıxarılması iddiası ilə məhkəməyə müraciət edib. 5 aprel 2005-ci ildə Daşkəsən Rayon Məhkəməsi iddianın əsaslandırılmaması əsası ilə iddianı təmin etməyib. Məhkəmə qeyd edib ki, Ərizəçinin inzibati xətaya görə məhkumluğu hələ davam etdiyi üçün onun işdən çıxarılması Əmək Məcəlləsinin 74-cü maddəsinin "ç" bəndinə (öz əmək funksiyalarını yerinə yetirməmə) müvafiqdir.
Şikayətçi birinci instansiya məhkəməsinin qanunu düzgün tətbiq etməməsi əsası ilə apellyasiya şikayəti verib. 29 iyul 2005-ci il tarixli qərarı ilə Apellyasiya Məhkəməsi apellyasiya şikayətini rədd edib.
Məqalə müəllifi ilə əlaqə ünvanı: [email protected]
