Azərbaycan, Bakı, 20 may / Trend , müxbir K.Zərbalıyeva /
"Sumqayıt Gənclərinin Hüquqi Maarifləndirilməsi" İctimai Birliyinin (İB) Milli Televiziya və Radio Şurasına (MTRŞ) qarşı qaldırdığı iddia üzrə hazırlıq iclası keçirilib.
Çərşənbə günü 1 saylı Bakı İqtisad Məhkəməsində keçirilən iclasda məhkəmə baxışının iyunun 14-də keçirilməsi qərara alınıb.
Trend -a məlumat verən birliyin rəhbəri Elçin Məmməd bildirib ki, MTRŞ Sumqayıt şəhərində yerli telekanalın açılması üçün İB-yə lisenziya verməyib.
Məmməd Nuşirəvan Məhərrəmlini regional telekanalların inkişafına bürokratik əngəl yaratmaqda ittiham edir.
"Sumqayıt şəhərində yalnız bir telekanal fəaliyyət göstərir ki, bu da yarım milyona yaxın əhalisi olan bir şəhər üçün xeyli aşağı göstəricidir. Ona görə də "Sumqayıt Gənclərinin Hüquqi Maarifləndirilməsi" İB Sumqayıt şəhərində yeni bir telekanalın açılması təşəbbüsü ilə çıxış edib və bu məqsədlə 5 min nəfərdən imza toplayıb", - birlik rəhbəri vurğulayıb.
Birlik tərəfindən bu ilin yanvar ayında Sumqayıt şəhərində yerli telekanalın açılması üçün lisenziya verilməsi ilə bağlı MTRŞ-ya müraciət olunub.
MTRŞ isə cavab olaraq bildirib ki, hazırda Sumqayıtda yeni telekanalın açılmasına ehtiyac yoxdur.
MTRŞ-nin hüquq şöbəsinin müdiri Nemət Cavadov Trend -a bildirib ki, hər hansı regionda telekanalın açılması müsabiqə yolu ilə mümkündür.
Cavadovun sözlərinə görə, Dövlət Radiotezliklər Komitəsi tezliklərin siyahısını MTRŞ-yə təqdim edir.
"MTRŞ zəruri hesab etdiyi ərazidə həmin tezlik üzrə müsabiqə elan edir", - şöbə müdiri bildirib.
MTRŞ rəsmisi bildirib ki, Sumqayıtla bağlı MTRŞ-yə tezlik təqdim olunmayıb.
"Təqdim olunarsa belə, buna zərurət olduğu halda müsabiqə keçirilər. Hazırda Sumqayıtda bir telekanal fəaliyyət göstərir. Elə regionlar var ki, orada yerli telekanallar yoxdur. MTRŞ bu məsələdə balanslaşdırılmış siyasət həyata keçirir", - Cavadov vurğulayıb.
Məqalə müəllifi ilə əlaqə ünvanı:[email protected]
