Azərbaycan, Bakı, 05 iyun / Trend , müxbir K.Zərbalıyeva /
Azərbaycanda ötən ay ən çox qanun pozuntusuna yol verən ali məktəb Azərbaycan Beynəlxalq Universiteti (ABU) olub.
Trend -un məlumatına görə, "Tələbələrin Beynəlxalq Əməkdaşlığı" İctimai Birliyinin "Təhsil xəbərləri" layihəsinin aylıq hesabatında bu barədə məlumat verilib.
Hesabatda qeyd olunub ki, ABU-da tələbələr onlara satılan kitab və biletlərin pullarını vaxtında vermədikələri üçün dərslərdən qovulublar. Həmçinin onlar fakültə dekanları tərəfindən təhqir olunub. Bu, əsasən İqtisadiyyatın Hüquqi Tənzimlənməsi Fakültəsində baş verib. Fakültə dekanı Adil Güləliyev kitab pullarının vaxtında çatdırılmayacağı təqdirdə tələbələrin ali məktəbdən xaric olunacağını bildirib.
Bir neçə fakültədə isə tələbələr arasında ayrıseçkiliyə yol verilib. Universitetə Tələbə Qəbulu üzrə Dövlət Komissiyasının xətti ilə qəbul olunmuş tələbələrlə köçürülmə yolu ilə gələn tələbələr ayrı-ayrılıqda imtahan verməli olacaqlar. Həmin tələbələrin eyni fakültədə və eyni kursda oxumalarına baxmayaraq universitet rəhbərliyi heç bir səbəb gətirmədən belə addım atıb.
Təhsil naziri Misir Mərdanov daha öncə jurnalistlərə açıqlamasında Beynəlxalq Universitetdə qanun pozuntularının olduğunu deyib.
Məsələ ilə bağlı Beynəlxalq Universitetin mətbuat xidməti ilə əlaqə saxlamaq mümkün olmayıb.
Məqalə müəllifi ilə əlaqə ünvanı: [email protected]