Azərbaycan, Bakı, 08 iyun / Trend , müxbir A. Hüseynbala /
Dünya Azərbaycanlıları Konqresi hesab edir ki, azərbaycanlıların İranda keçiriləcək prezident seçkisi ərəfəsi fəallaşması təbiidir və onların müqaviməti getdikcə daha da artacaq.
"İrandakı soydaşlarımızın indiyə qədər apardığı mübarizə xarici amillərlə bağlı olduğundan, uğursuz nəticələnib. Artıq güneyli qardaşlarımız daha çox özlərinə güvənməlidirlər", - bazar ertəsi Trend -a Dünya Azərbaycanlıları Konqresinin (DAK) həmsədri, Vətəndaş Həmrəyliyi Partiyasının (VHP) sədri, millət vəkili Sabir Rüstəmxanlı bildirib.
Trend -un arayışı: Güney Azərbaycanda 35 milyona yaxın soydaşımız yaşayır. Son zamanlar İran hakimiyyət orqanlarının soydaşlarımıza qarşı apardığı repressiyalar, müxtəlif müddətlərə həbsxanalara salınanların işgəncələrə məruz qalması faktları çoxalıb.
Rüstəmxanlının sözlərinə görə, Güney Azərbaycanda başlanan milli-azadlıq hərəkatının qarşısını heç cür almaq mümkün deyil. "İranda prezidentliyə namizədlərin seçki kampaniyası zamanı soydaşlarımıza öz dillərində məktəb açılacağı ilə bağlı və digər vədlər verməsinə inanmaq olmaz. Bu, seçkiöncəsi təbliğatdır və əvvəlki illərdəki vədlərdən az fərqlənir. Seçki başa çatan kimi bu vədlərin hamısı yenə yaddan çıxacaq", - DAK həmsədri əlavə edib.
Onun fikrincə, Güney Azərbaycandakı soydaşlarımız prezidentliyə namizədlərin vədlərinin qanunlarda təsbit olunmasına çalışmalıdırlar. Rüstəmxanlı deyib ki, DAK-ın İranda yaşayan azərbaycanlıların hüquqlarının müdafiəsi ilə bağlı xüsusi planları var. "Biz ardıcıl fəaliyyət göstəririk. Beynəlxalq təşkilatlara və dünya ölkələrinin parlamentlərinə Güney Azərbaycandakı problemləri çatdırmaq üçün artıq xeyli iş görülüb", - DAK həmsədri vurğulayıb.
Rüstəmxanlının sözlərinə görə, konqresin nümayəndə heyəti bütün xarici səfərlərində İranda soydaşlarımıza qarşı yönələn təzyiq və təqiblərlə yanaşı, Dağlıq Qarabağ problemi ilə də bağlı həqiqətləri çatdırmağa çalışır.
İranda prezident seçkisi iyunun 12-də keçiriləcək.
Məqalə müəllifi ilə əlaqə ünvanı: [email protected]