Azərbaycan, Bakı, 09 iyun / Trend , müxbir K.Zərbalıyeva /
Bakının Nəsimi rayon məhkəməsi Mülki Məcəllənin və Cinayət-Prosessual Məcəllənin maddələrinin şərhi ilə bağlı Konstitusiya Məhkəməsinə müraciət edib.
Konstitusiya Məhkəməsindən çərşənbə axşamı Trend -a verilən məlumata görə, həftə ərazində Plenumun iclasında həmin müraciətlərə baxılacaq.
Nəsimi rayon məhkəməsi təcrübədə yaranan problemləri əsas gətirərək bildirib ki, banklar pul öhdəliklərinin icra edilməməsi zamanı cavabdeh şəxslərdən artıq məbləğdə faizlər tutulmasını tələb edir.
Bu məsələnin nizama salınması məqsədilə Nəsimi rayon məhkəməsi Mülki Məcəllənin pul öhdəliklərinin icra edilməməsi üçün məsuliyyət adlanan 449-cu maddənin şərh olunmasını Konstitutsiya Məhkəməsindən xahiş edib.
Nəsimi rayon məhkəməsinin Cinayət-Prosessual Məcəllənin 449-cu maddəsinin şərhi ilə bağlı müraciətində isə cinayət prosesinin iştirakçılarının şikayət etmək məsələsinin nizama salınması xahiş olunur.
Cinayət priosesini həyata keçirən orqanın prosessual hərəkətlərindən və qərarlarından məhkəməyə şikayət verilməsini nəzərdə tutan maddədə cinayət işinin başlanmaması haqqında rədd qərarından təqsirləndirilən şəxs və onun müdafiəçisinin şikayət vermək hüququ nəzərdə tutulur.
Prosesin digər iştirakçılarının - zərərçəkmiş və onun müdafiəçisinin bu qərardan şikayət vermək məsələsi isə həll olunmayıb. Nəsimi rayon məhkəməsi də məhz bu hissə ilə bağlı şərh verilməsini istəyir.
Məqalə müəllifi ilə əlaqə ünvanı: [email protected]