Azərbaycan, Bakı, 25 noyabr / Trend , müxbir H.Bağırov/
Azərbaycanda dələduzluqda ittiham olunan "Rona" MMC şirkətinin əməkdaşlarına hökm oxunub.
Trend -un məlumatına görə, çərşənbə axşamı Ağır Cinayətlərə Dair İşlər üzrə Məhkəmənin hökmü ilə Marina Məmmədova 4 il azadlıqdan məhrum edilib. Digər zamində olan təqsirləndirilən şəxslər Podoqova İrina Petrovna və Rövşən Nağızadənin hər birinə 4 il şərti cəza təyin edilib.
Şirkətin təsisçisi Nağızadə, baş mühasib Məmmədova və mühasib Petrovna 2004-cü ildə "Space" telekanalında imkansız şəxslərə yardım adı altında "Mərhəmət sorağında" proqramını hazırlayıb təqdim ediblər. Proqramda "Azercell" tərəfindən ayrılan nömrəyə tamaşaçılar tərəfindən göndərilən SMS-lərin dəyəri şirkətin "Qoçbank"dakı hesabına köçürülüb. Adı çəkilən şəxslər hesaba köçürülən 57 445 manatı mənimsəməkdə təqsirləndirilirlər.
Təqsirləndirilən şəxslər Cinayət Məcəlləsinin külli miqdarda ziyan vurmaqla dələduzluq törətmə (178.3.2) və külli miqdarda vergi ödəməkdən yayınma (213.4) maddələri ilə ittiham olunublar.
Məqalə müəllifi ilə əlaqə ünvanı: [email protected]
