Azərbaycan, Bakı, 22 yanvar / Trend , müxbir H.Bağırov/
Azərbaycanda qanunsuz silah saxlama və vəzifə səlahiyyətlərini aşmaqda təqsirli bilinən hərbi qulluqçunun apelyasiya şikayətinə baxılıb.
Trend -un məlumatına görə, bu gün Gəncə Apelyasiya Məhkəməsində Müdafiə Nazirliyinin "N" saylı hərbi hissəsinin hərbi qulluqçusu, gizir Taleh Mirhüseyn oğlu Zeynalovun apelyasiya şikayəti üzrə keçirilən prosesdə qərar elan edilib. Qərara görə, Zeynalovun apelyasiya şikayəti təmin edilməyib.
Zeynalov Gəncə Hərbi Məhkəməsinin hökmü ilə 6 il müddətinə azadlıqdan məhrum edilib. O, Cinayət Məcəlləsinin qanunsuz olaraq odlu silah, onun komplekt hissələrini, döyüş sursatı, partlayıcı maddələr və qurğular əldə etmə, başqasına vermə, satma, saxlama, daşıma və gəzdirmə (228.1), hakimiyyətdən sui-istifadə etmə, hakimiyyət həddini aşma və ya hakimiyyətdən istifadə etməmə (341.1) maddələri ilə ittiham olunub.
Zeynalov hərbi hissənin silah anbarının döşəməsindən tapdığı "Kalaşnikov" tipli avtomat silahın komplekt hissələrini taparaq, sənədləşdirmək əvəzinə özündə saxlayıb.