...

Azərbaycanda məişət zorakılığı ilə bağlı debat keçirilib

Cəmiyyət Materials 4 May 2010 16:21 (UTC +04:00)
Azərbaycan Parlamentinin deputatı hesab edir ki, "Məişət zorakılığı haqqında" qanun milli-mənəvi, ailə dəyərləri fonunda bütün incəliklər gözlənilməklə qəbul edilməlidir.

Trend-i buradan izləyin

Azərbaycan, Bakı, 4 may /Trend, müxbir K.Zərbalıyeva/

Azərbaycan Parlamentinin deputatı hesab edir ki, "Məişət zorakılığı haqqında" qanun milli-mənəvi, ailə dəyərləri fonunda bütün incəliklər gözlənilməklə qəbul edilməlidir.

Trend-in məlumatına görə, millət vəkili Rafael Cəbrayılov "Ailədaxili zorakılıq insan alverinin əsas səbəbidir" mövzusunda "Təmiz Dünya" İctimai Birliyinin rəhbəri Mehriban Zeynalova ilə debatda bu barədə məlumat verib.

Millət vəkili indiyədək belə bir qanunun qəbul edilməməsinin Azərbaycanda insan alveri ilə mübarizə işinə birbaşa təsirini qəbul etmir.

Cəbrayılov deyib ki, insan alverinin qurbanlarının əksəriyyəti problemli ailələrdən çıxan qadınlardır.

Millət vəkili parlamentdə "Məişət zorakılığı haqqında" qanun layihəsinin hazırlandığını bildirib və qeyd edib ki, belə bir qanunun tələm-tələsik, milli-mənəvi dəyərlər nəzərə alınmadan qəbul edilməsi qeyri-mümkündür.

"Bu gün ailələrdə zorakılığın, hansısa cinayət hadisələrinin baş verdiyini istisna etmirəm. Qanun ailə kandarından o zaman içəri keçməlidir ki, bunu cəmiyyətin və dövlətin mənafeləri tələb etsin. "Məişət zorakılığı haqqında" qanun layihəsinin tətbiqi dairəsinə təkcə qadınlar deyil, uşalar, nənə və babalar, əlillər və digər şəxslər də daxil ola bilər", - millət vəkili bildirib.

Zeynalova isə bu qanunun indiyədək qəbul edilməməsini insan alveri ilə mübarizədə problem yaradan amillərdən biri kimi qəbul edir.

"İnsan alverçiləri hər zaman zəncirin zəif yerini axtarırlar. Bu qanun qəbul edilərsə, bu zəncirin zəif bəndini möhkəmləndirmiş olarıq", - Zeynalova vurğulayıb.

O bildirib ki, Azərbaycanda insan alveri qurbanları sırasında məişət zorakılığının qurbanları olan qadınlar kifayət qədərdir.

Birliyin sədri də yeni qanunun qəbulu zamanı Azərbaycanın milli-mənəvi və ailə dəyərlərinin nəzərə alınmasını vacib sayır.

Xəbər lenti

Xəbər lenti