Azərbaycan, Bakı, 13 oktyabr /Trend, müxbir K. Zərbalıyeva/
Azərbaycan Ali Məhkəməsi Vəkillər Kollegiyasının İxtisas Komissiyasının hakim üzvlərini təyin edib.
Kollegiyadan çərşənbə günü Trend-ə verilən məlumata görə, Ali Məhkəmənin Plenumunun bir neçə gün əvvəl keçirilən iclasında Ali Məhkəmənin hakimləri Səadət Bektaşi və Mehdi Əsədov İxtisas Komissiyasına üzv seçiliblər.
Kollegiyadan bildirilib ki, komissiyanın iki vəkil üzvü isə Rəyasət Heyətinin yaxın günlərdə keçiriləcək iclasında seçiləcək.
İxtisas Komissiyasının tərkibi tam formalaşandan sonra, Vəkillər Kollegiyasına üzvlüyə qəbulla bağlı sənəd vermiş, əvvəllər hakim və vəkil işləmiş 36 nəfərdən müsahibə götürüləcək.
Əvvəllər hakim və vəkil işləmiş şəxslər vəkilliyə imtahansız qəbul edilirlər.
"Vəkillər və vəkillik fəaliyyəti haqqında" Qanuna edilən sonuncu əlavə və dəyişikliklər əvvəllər hakim və ya vəkil işləmiş şəxslərə belə bir imkan yaradıb.
Qanuna əlavə və dəyişikliklərdə qeyd olunur ki, əvvəllər vəkil (intizam qaydasında vəkillik fəaliyyətinə xitam verilmiş şəxslər istisna olmaqla) və ya hakim olmuş şəxslər yazılı test vermədən və icbari təlimə cəlb olunmadan, şifahi müsahibədən keçdikdən sonra vəkil ola bilərlər.
Əlavə və dəyişikliklərə qədər hakim və ya vəkil işləmiş şəxslət test imtahanı verməklə yanaşı, icbari təlim alandan sonra vəkillik fəaliyyətinə başlayırdılar.
Hazırda Azərbaycanda 800-ə yaxın vəkil var.
